ლატვიის სტანდარტების ორგანომ (LVS) კორპორაცია ტილდესთან (Tilde) ერთად დაიწყო ლატვიის რესპუბლიკის საგარეო საქმეთა სამინისტროს გრანტის „სტანდარტიზაცია, როგორც დამხმარე საშუალება საქართველოში COVID-19 პანდემიით გამოწვეული საგანგებო სიტუაციაზე სწრაფი რეაგირებისათვის” განხორციელება. საქართველოდან პროექტის პარტნიორია საქართველოს ეკონომიკისა და მდგრადი განვითარების სამინისტროს სსიპ საქართველოს სტანდარტებისა და მეტროლოგიის ეროვნული სააგენტო (GeoSTM).
პროექტის მიზანია ხელი შეუწყოს საქართველოს სტანდარტიზაციის სისტემის შესაძლებლობების შემდგომ გაძლიერებას მიაწოდოს მოთხოვნის შესაბამისი საჯაროდ და ოპერატიულად ხელმისაწვდომი ინფორმაცია, გადაწყვეტილებები და საუკეთესო პრაქტიკა ინდივიდუალური დაცვის საშუალებებზე არსებულ საერთაშორისო და ევროპულ სტანდარტებზე დაყრდნობით, ინდივიდუალური დამცავი საშუალებების წარმოების, აგრეთვე ადგილობრივი ბიზნესის უწყვეტობისა და მდგრადობის ხელშეწყობისთვის.
პროექტი ითვალისწინებს ინდივიდუალური დაცვის საშუალებებზე არსებული საერთაშორისო და ევროპული სტანდარტების ქართულ ენაზე თარგმნასა და გამოქვეყნებას, რაც ხელს შეუწყობს აღნიშნულ კატეგორიაში შემავალი (მაგალითად, სახის ნიღბები, სამედიცინო სამოსი, ხელთათმანები და ა.შ.) პროდუქტების წარმოებით დაინტერესებულ ადგილობრივ კომპანიებს წარმოების მასშტაბების ზრდაში.
პროექტის პარტნიორ „ტიდლე“-სთან ერთად დაგეგმილია შეიქმნას ონლაინ პლატფორმა (საცდელი ვერსია) ტექნიკური და სახელმძღვანელო დოკუმენტების და ა.შ. სათარგმნად, ასევე, ოპერატიული თარგმანისთვის თემატური მასალები, ელექტრონული სწავლების პლატფორმა და სასწავლო პროგრამის საპილოტე ვერსია. „ტიდლე“ ევროპაში ცნობილია, როგორც წამყვანი ენობრივი ტექნოლოგიების და ლოკალიზაციის კომპანია, რომელიც ქმნის მანქანური თარგმნის სისტემას, ონლაინ ტერმინოლოგიურ სერვისებს, მობილური მთარგმნელობით პროგრამებსა და ენობრივი კორექტირების საშუალებებს.
პროექტის ფარგლებში დაგეგმილი აქტივობების დანერგვა გააუმჯობესებს GeoSTM-ის შესაძლებლობებს COVID-19 და მსგავს სიტუაციებში შექმნილ კრიზისულ გამოწვევებზე რეაგირებასა და გადაჭრაში, სადაც სტანდარტიზაცია და სტანდარტები თამაშობს მნიშვნელოვან როლს. ასევე, ხელს შეუწყობს მთარგმნელობით და სხვა მიმდინარე პროცესების ავტომატიზაციას. ხოლო, ელექტრონული სწავლების პლატფორმა თავის მხრივ გაზრდის ინფორმაციისა და განათლების ხელმისაწვდომობას სტანდარტიზაციის, შესაბამისობის შეფასების პროცედურებზე, სამიზნე ჯგუფების ფართო სპექტრისთვის (მეწარმეები, სტუდენტები, ექსპერტები და ა.შ.).
აღნიშნული პროექტი დაფინანსდა ლატვიის რესპუბლიკის საგარეო საქმეთა სამინისტროს განვითარებისა და თანამშრომლობის 2020 წლის ბიუჯეტით.
